ಕೊಲೆ ಪ್ರಕರಣದಲ್ಲಿ ಜೈಲಿನಲ್ಲಿರುವ ನಟ ದರ್ಶನ್ ಅವರನ್ನು ಪತ್ನಿ ವಿಜಯಲಕ್ಷ್ಮೀ ಭೇಟಿಯಾಗಿದ್ದಾರೆ. ಈ ವೇಳೆ ಧನ್ವೀರ್‌ಗೆ ಸಂಬಂಧಿಸಿದ ಆಡಿಯೋ ವಿಚಾರ ಸೇರಿದಂತೆ ಇತ್ತೀಚೆಗೆ ನಡೆದ ಹಲವು ಘಟನೆಗಳ ಬಗ್ಗೆ ದರ್ಶನ್ ಜೊತೆ ಚರ್ಚಿಸಿದ್ದಾರೆ ಎನ್ನಲಾಗಿದೆ. ಇದೇ ಸಂದರ್ಭದಲ್ಲಿ, ತಮ್ಮ ಬಗ್ಗೆ ಹೊರಗಡೆ ತಪ್ಪು ಅಭಿಪ್ರಾಯ ಮೂಡಿಸಲಾಗುತ್ತಿದೆ ಎಂದು ವಿಜಯಲಕ್ಷ್ಮೀ ಬೇಸರ ವ್ಯಕ್ತಪಡಿಸಿದ್ದಾರೆ ಎಂಬ ಮಾಹಿತಿ ಹೊರಬಿದ್ದಿದೆ.
ನಿಮ್ಮನ್ನು ಬಿಡಿಸೋಕೆ ಇಷ್ಟ ಇಲ್ಲ ಅಂತ ಹೇಳ್ತಿದ್ದಾರೆ
ದರ್ಶನ್ ಅವರನ್ನು ಜೈಲಿನಿಂದ ಬಿಡಿಸಲು ವಿಜಯಲಕ್ಷ್ಮೀ ಅವರಿಗೆ ಇಷ್ಟವಿಲ್ಲ ಎಂಬರ್ಥದಲ್ಲಿ ಕೆಲವರು ಬಿಂಬಿಸುತ್ತಿದ್ದಾರೆ ಎನ್ನುವ ವಿಚಾರವನ್ನು ಅವರು ಪತಿಯ ಬಳಿ ಪ್ರಸ್ತಾಪಿಸಿದ್ದಾರೆ ಎನ್ನಲಾಗಿದೆ.
‘ನನಗೆ ನಿಮ್ಮನ್ನು ಬಿಡಿಸೋಕೆ ಇಷ್ಟ ಇಲ್ಲ ಅಂತ ಬಿಂಬಿಸುತ್ತಿದ್ದಾರೆ, ಗೊತ್ತಾ?’ ಎಂದು ವಿಜಯಲಕ್ಷ್ಮೀ ಹೇಳಿದಾಗ, ದರ್ಶನ್ ‘ಹೌದಾ ಪುಟ್ಟ’ ಎಂದು ನಗುತ್ತಾ ಪ್ರತಿಕ್ರಿಯಿಸಿದ್ದಾರೆ ಎನ್ನಲಾಗಿದೆ.
ಈ ಸಂಭಾಷಣೆಯ ಆಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಆದರೆ, ಈ ಆಡಿಯೋದ ಮೂಲ ಮತ್ತು ಅದರಲ್ಲಿರುವ ಮಾತುಗಳ ನಿಖರತೆಯನ್ನು ಸ್ವತಂತ್ರವಾಗಿ ದೃಢಪಡಿಸಲಾಗಿಲ್ಲ.
ಧನ್ವೀರ್ ಆಡಿಯೋ ವಿಚಾರದ ಬಗ್ಗೆಯೂ ಚರ್ಚೆ
ಧನ್ವೀರ್‌ಗೆ ಸಂಬಂಧಿಸಿದ ಆಡಿಯೋ ವಿಚಾರ, ನಾಗರಾಜ್ ಸೇರಿದಂತೆ ಕೆಲವರೊಂದಿಗೆ ನಡೆದ ವಾಗ್ವಾದ ಹಾಗೂ ಧನ್ವೀರ್ ಮನೆ ಬಳಿ ಹಣ ಕೇಳಲು ಹೋದಾಗ ನಡೆದ ಘಟನೆಗಳ ಕುರಿತು ವಿಜಯಲಕ್ಷ್ಮೀ ಅವರು ದರ್ಶನ್‌ಗೆ ವಿವರಿಸಿದ್ದಾರೆ ಎನ್ನಲಾಗಿದೆ.
ಈ ವಿಚಾರಗಳನ್ನು ಕೇಳಿದ ದರ್ಶನ್, ಯಾವುದೇ ಕಾರಣಕ್ಕೂ ಕಾನೂನಿನ ಹಾದಿ ಬಿಟ್ಟು ಹೋಗಬಾರದು ಎಂದು ಪತ್ನಿಗೆ ಸಲಹೆ ನೀಡಿದ್ದಾರೆ ಎನ್ನಲಾಗಿದೆ.
ಧನ್ವೀರ್ ಇಷ್ಟೆಲ್ಲ ಮಾಡುತ್ತಿದ್ದಾನೆ ಎಂದರೆ, ಆತನ ಹಿಂದೆ ಯಾರಿದ್ದಾರೆ? ಎಂದು ದರ್ಶನ್ ಪ್ರಶ್ನಿಸಿದಾಗ, ವಿಜಯಲಕ್ಷ್ಮೀ ಅವರಿಗೆ ತಿಳಿದಿಲ್ಲ ಎಂದು ಉತ್ತರಿಸಿದ್ದಾರೆ ಎಂಬ ಮಾಹಿತಿ ಲಭ್ಯವಾಗಿದೆ.
ನಮಗೂ ಕಾಲ ಬರುತ್ತೆ ಎಂದ ದರ್ಶನ್
ಸದ್ಯದ ಪರಿಸ್ಥಿತಿಯಲ್ಲಿ ತಾಳ್ಮೆಯಿಂದ ಇರಬೇಕು ಮತ್ತು ಕಾನೂನುಬದ್ಧವಾಗಿಯೇ ಹೋರಾಟ ಮುಂದುವರಿಸಬೇಕು ಎಂಬ ಸಲಹೆಯನ್ನು ದರ್ಶನ್ ಪತ್ನಿಗೆ ನೀಡಿದ್ದಾರೆ ಎನ್ನಲಾಗಿದೆ. ‘ನಮಗೂ ಕಾಲ ಬರುತ್ತೆ’ ಎಂದು ವಿಜಯಲಕ್ಷ್ಮೀ ಅವರಿಗೆ ಧೈರ್ಯ ತುಂಬಿದ್ದಾರೆ ಎಂಬ ವರದಿಗಳೂ ಇವೆ.
