ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಂಚರಿಸುವಾಗ ಟೋಲ್ ಪ್ಲಾಜಾ ಕಂಡ ತಕ್ಷಣ ನಿಮ್ಮ ಜೇಬಿನಲ್ಲಿರುವ ಹಣದ ಲೆಕ್ಕ ಹಾಕುತ್ತೀರಾ? ಪ್ರತಿದಿನ ಕೆಲಸಕ್ಕೆ ಹೋಗುವಾಗ, ಊರಿಗೆ ಪ್ರಯಾಣಿಸುವಾಗ ಟೋಲ್ ಶುಲ್ಕವೇ ಹೆಚ್ಚುವರಿ ಹೊರೆಯಾಗಿದೆಯೇ? ಹಾಗಿದ್ದರೆ, ನಿಮಗೊಂದು ಸಿಹಿಸುದ್ದಿ! ಟೋಲ್ ಪ್ಲಾಜಾ ಸಮೀಪ ವಾಸಿಸುವ ಅರ್ಹ ವಾಹನ ಸವಾರರಿಗೆ ನವೆಂಬರ್‌ 1ರಿಂದ ಕೇವಲ ₹1,500ಕ್ಕೆ ವಾರ್ಷಿಕ ಲೋಕಲ್‌ FASTag ಪಾಸ್ ಪಡೆಯುವ ಅವಕಾಶ ಕಲ್ಪಿಸಲಾಗುತ್ತಿದೆ ಎಂಬ ಮಾಹಿತಿ ಗಮನ ಸೆಳೆದಿದೆ. ಆದರೆ, ಈ ಸೌಲಭ್ಯ ಯಾರಿಗೆ ಸಿಗಲಿದೆ, ಯಾವ ಷರತ್ತುಗಳು ಅನ್ವಯಿಸುತ್ತವೆ ಎಂಬುದನ್ನು ತಿಳಿದುಕೊಳ್ಳುವುದು ಅಗತ್ಯ.
ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯದ ಅಧಿಸೂಚನೆಯ ಪ್ರಕಾರ, ರಾಷ್ಟ್ರೀಯ ಹೆದ್ದಾರಿಯ ಟೋಲ್ ಪ್ಲಾಜಾದಿಂದ 20 ಕಿ.ಮೀ. ವ್ಯಾಪ್ತಿಯಲ್ಲಿ ವಾಸಿಸುವ ಅರ್ಹ ವಾಣಿಜ್ಯೇತರ ವಾಹನ ಮಾಲೀಕರು ಈ ಸೌಲಭ್ಯ ಪಡೆಯಬಹುದು. ಪ್ರಸ್ತುತ ವೈಯಕ್ತಿಕ ವಾಹನ ಸವಾರರಿಗೆ ವಾರ್ಷಿಕ FASTag ಪಾಸ್ ₹3,000ಕ್ಕೆ ಲಭ್ಯವಿದ್ದು, ಹೊಸ ಸ್ಥಳೀಯ ಪಾಸ್ ವ್ಯವಸ್ಥೆಯಡಿ ಅರ್ಹರಿಗೆ ₹1,500ರ ದರದಲ್ಲಿ ಸೌಲಭ್ಯ ಒದಗಿಸುವ ಉದ್ದೇಶವಿದೆ.
ಆದರೆ, ಈ ರಿಯಾಯಿತಿ ಎಲ್ಲ ವಾಹನ ಸವಾರರಿಗೂ ಅನ್ವಯಿಸುವುದಿಲ್ಲ. ಟೋಲ್ ಪ್ಲಾಜಾದಿಂದ ನಿಗದಿತ ವ್ಯಾಪ್ತಿಯಲ್ಲಿ ವಾಸಿಸುವುದು, ವಾಹನಕ್ಕೆ ಸಕ್ರಿಯ ಮತ್ತು ಮಾನ್ಯ FASTag ಹೊಂದಿರುವುದು ಸೇರಿದಂತೆ ಅರ್ಹತಾ ಷರತ್ತುಗಳನ್ನು ಪೂರೈಸಬೇಕು. ಅಲ್ಲದೆ, ಪಾಸ್ ಪಡೆದ ನಿರ್ದಿಷ್ಟ ಟೋಲ್ ಪ್ಲಾಜಾದಲ್ಲಿ ಮಾತ್ರ ಈ ಸೌಲಭ್ಯ ಬಳಸಲು ಸಾಧ್ಯವಾಗುತ್ತದೆ.
ಹಾಗಾದರೆ, ಈ ಪಾಸ್ ಯಾರಿಗೆ ಸಿಗಲಿದೆ? ಯಾವ ವಾಹನಗಳಿಗೆ ಅನ್ವಯಿಸುವುದಿಲ್ಲ? ಯಾವ ಸಂದರ್ಭಗಳಲ್ಲಿ ಸ್ಥಳೀಯರಿಗೆ ರಿಯಾಯಿತಿ ಸಿಗುವುದಿಲ್ಲ? FASTag ಪಾಸ್ ಪಡೆಯುವ ಮುನ್ನ ತಿಳಿದುಕೊಳ್ಳಬೇಕಾದ ಪ್ರಮುಖ ವಿವರಗಳು ಇಲ್ಲಿವೆ.
ಹೊಸ ನಿಯಮದ ಪ್ರಕಾರ ಯಾರಿಗೆ ಪಾಸ್ ಲಭ್ಯ?
ಹೊಸ ನಿಯಮದ ಪ್ರಕಾರ, ಟೋಲ್ ಪ್ಲಾಜಾದಿಂದ 20 ಕಿ.ಮೀ. ವ್ಯಾಪ್ತಿಯಲ್ಲಿ ವಾಸಿಸುವ ಅರ್ಹ ವಾಣಿಜ್ಯೇತರ ವಾಹನ ಮಾಲೀಕರು ಈ ರಿಯಾಯಿತಿ ಪಾಸ್ ಪಡೆಯಬಹುದು. ಆದರೆ, ಅವರ ವಾಹನದಲ್ಲಿ ಮಾನ್ಯವಾಗಿರುವ ಮತ್ತು ಸಕ್ರಿಯ ಫಾಸ್ಟ್ಟ್ಯಾಗ್ ಇರಬೇಕು.
ಅರ್ಹ ವಾಹನ ಮಾಲೀಕರು ನಿರ್ದಿಷ್ಟ ಟೋಲ್ ಪ್ಲಾಜಾ ಮೂಲಕ ಸಂಚರಿಸಲು ಈಗಿರುವ ಮಾಸಿಕ ಪಾಸ್ ಅಥವಾ ರಿಯಾಯಿತಿ ದರದ ಸ್ಥಳೀಯ ಪಾಸ್ ಆಯ್ಕೆ ಮಾಡಿಕೊಳ್ಳಬಹುದು. ಈ ಪಾಸ್ ಯಾವ ಟೋಲ್ ಪ್ಲಾಜಾಗೆ ಪಾವತಿಸಿ ಪಡೆಯಲಾಗುತ್ತದೆಯೋ, ಅದೇ ಟೋಲ್ ಪ್ಲಾಜಾದಲ್ಲಿ ಮಾತ್ರ ಮಾನ್ಯವಾಗಿರುತ್ತದೆ. ಬೇರೆ ಟೋಲ್ ಪ್ಲಾಜಾಗಳಲ್ಲಿ ಇದನ್ನು ಬಳಸಲು ಸಾಧ್ಯವಿಲ್ಲ.
ಈ ವ್ಯಕ್ತಿಗಳಿಗೆ ಪಾಸ್ ಸಿಗುವುದಿಲ್ಲ!
‘ಕ್ಲೋಸ್ಡ್ ಯೂಸರ್ ಫೀ ಕಲೆಕ್ಷನ್ ಸಿಸ್ಟಮ್’ ಆಧಾರದಲ್ಲಿ ಶುಲ್ಕ ಸಂಗ್ರಹಿಸುವ ಯಾವುದೇ ರಾಷ್ಟ್ರೀಯ ಹೆದ್ದಾರಿ ಅಥವಾ ಎಕ್ಸ್ಪ್ರೆಸ್ವೇಯಲ್ಲಿ ಸ್ಥಳೀಯ ನಿವಾಸಿಗಳಿಗೆ ರಿಯಾಯಿತಿ ಪಾಸ್ಗಳನ್ನು ನೀಡಲಾಗುವುದಿಲ್ಲ ಎಂದು ಸಚಿವಾಲಯ ತಿಳಿಸಿದೆ.
ಇದಲ್ಲದೆ, ಪ್ರಯಾಣಿಕರಿಗೆ ಸರ್ವಿಸ್ ರಸ್ತೆ ಅಥವಾ ಪರ್ಯಾಯ ಮಾರ್ಗದ ಸೌಲಭ್ಯ ಲಭ್ಯವಿರುವ ಸ್ಥಳಗಳಲ್ಲಿಯೂ ಇಂತಹ ಪಾಸ್ಗಳನ್ನು ನೀಡಲಾಗುವುದಿಲ್ಲ. ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯದ (MoRTH) ಮಾಹಿತಿಯ ಪ್ರಕಾರ, ದೇಶಾದ್ಯಂತ 13 ಕೋಟಿಗೂ ಅಧಿಕ ಫಾಸ್ಟ್ಟ್ಯಾಗ್ಗಳನ್ನು ವಿತರಿಸಲಾಗಿದೆ.
ಹೊಸ ನಿಯಮದ ಉದ್ದೇಶವೇನು?
ಟೋಲ್ ಪ್ಲಾಜಾಗಳ ಸಮೀಪ ವಾಸಿಸುವ ಅರ್ಹ ಜನರಿಗೆ ಕಡಿಮೆ ವೆಚ್ಚದಲ್ಲಿ ಪ್ರಯಾಣಿಸುವ ಅವಕಾಶ ಒದಗಿಸುವುದು, ಅವರ ಸಂಚಾರವನ್ನು ಸುಲಭಗೊಳಿಸುವುದು ಮತ್ತು ಪದೇಪದೇ ಟೋಲ್ ಪಾವತಿಸುವ ಹೊರೆಯನ್ನು ಕಡಿಮೆ ಮಾಡುವುದು ಈ ಹೊಸ ನಿಯಮದ ಪ್ರಮುಖ ಉದ್ದೇಶವಾಗಿದೆ.
‘ರಾಷ್ಟ್ರೀಯ ಹೆದ್ದಾರಿ ಕಾಯ್ದೆ, 1956’ರ ಅಡಿಯಲ್ಲಿ ಲಭ್ಯವಿರುವ ಅಧಿಕಾರಗಳನ್ನು ಬಳಸಿಕೊಂಡು, ‘ರಾಷ್ಟ್ರೀಯ ಹೆದ್ದಾರಿ ಶುಲ್ಕ ನಿಯಮಗಳು, 2026’ರ ಮೂಲಕ ಈ ತಿದ್ದುಪಡಿಯನ್ನು ಅಧಿಸೂಚಿಸಲಾಗಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.
ಗಮನಿಸಿ: ಈ ಪಾಸ್‌ನ ಅರ್ಹತೆ, ಅನ್ವಯಿಸುವ ಟೋಲ್ ಪ್ಲಾಜಾಗಳು ಮತ್ತು ಅರ್ಜಿ ಸಲ್ಲಿಸುವ ವಿಧಾನವನ್ನು ಅಧಿಕೃತ ಅಧಿಸೂಚನೆ ಅಥವಾ ಸಂಬಂಧಪಟ್ಟ ಟೋಲ್ ಪ್ಲಾಜಾದಿಂದ ಖಚಿತಪಡಿಸಿಕೊಳ್ಳಿ
